زمین لگتی ہے آسمانی بہت سکوں ہے

زمین لگتی ہے آسمانی بہت سکوں ہے

کسی کی جاری ہے مہربانی بہت سکوں ہے

حیات کے اک شجر کی اک شاخ دل ربا پر

ہے نغمہ زن طائر جوانی بہت سکوں ہے

غزل کا ساحل ہے یا کنارا ہے آرزو کا

سنا رہی ہے ہوا کہانی بہت سکوں ہے

یقیں کے دریا میں بد گمانی نے خودکشی کی

یہ تیری میری یہ کامرانی بہت سکوں ہے

نہ آئیں گے اب غموں نے کر لی ہے دل سے توبہ

یہ زندگانی ہے شادمانی بہت سکوں ہے

تری رفاقت ہے خوشبوؤں کے حصار جیسی

مہک رہی ہے تری نشانی بہت سکوں ہے

ستم شعارو تمہاری بھڑکائی آگ میں ہوں

یہاں بھی ہے میری قدردانی بہت سکوں ہے

ہماری چھت پر پرند کیونکر نہ آئیں زاہدؔ

یہاں میسر ہے دانہ پانی بہت سکوں ہے