zamin lagti hai aasmani bahut sukun hai

zamīn lagtī hai āsmānī bahut sukūñ hai

kisī kī jaarī hai mehrbānī bahut sukūñ hai

hayāt ke ik shajar kī ik shāḳh-e-dilrubā par

hai naġhma-zan tā.ir-e-javānī bahut sukūñ hai

ġhazal kā sāhil hai yā kinārā hai aarzū kā

sunā rahī hai havā kahānī bahut sukūñ hai

yaqīñ ke dariyā meñ bad-gumānī ne ḳhud-kushī kī

ye terī merī ye kāmrānī bahut sukūñ hai

na ā.eñge ab ġhamoñ ne kar lī hai dil se tauba

ye zindagānī hai shādmānī bahut sukūñ hai

tirī rifāqat hai ḳhushbuoñ ke hisār jaisī

mahak rahī hai tirī nishānī bahut sukūñ hai

sitam-shi’āro tumhārī bhaḌkā.ī aag meñ huuñ

yahāñ bhī hai merī qadrdānī bahut sukūñ hai

hamārī chhat par parind kyūñkar na aa.eñ 'zāhid'

yahāñ mayassar hai daana paanī bahut sukūñ hai

zamin lagti hai aasmani bahut sukun hai

kisi ki jari hai mehrbani bahut sukun hai

hayat ke ek shajar ki ek shaKH-e-dilruba par

hai naghma-zan tair-e-jawani bahut sukun hai

ghazal ka sahil hai ya kinara hai aarzu ka

suna rahi hai hawa kahani bahut sukun hai

yaqin ke dariya mein bad-gumani ne KHud-kushi ki

ye teri meri ye kaamrani bahut sukun hai

na aaenge ab ghamon ne kar li hai dil se tauba

ye zindagani hai shadmani bahut sukun hai

teri rifaqat hai KHushbuon ke hisar jaisi

mahak rahi hai teri nishani bahut sukun hai

sitam-shi’aro tumhaari bhaDkai aag mein hun

yahan bhi hai meri qadrdani bahut sukun hai

hamari chhat par parind kyunkar na aaen 'zahid'

yahan mayassar hai dana pani bahut sukun hai