zamin meri thi aur aasman mera tha

zamīn merī thī aur āsmān merā thā

ye kal kī baat hai saarā jahān merā thā

jahāñ se raah nikālī hai aaj logoñ ne

isī saḌak ke kināre makān merā thā

maiñ aaj saa.e kī hasrat liye bhaTaktā huuñ

bulandiyoñ pe kabhī sā.ebān merā thā

dahaktī ret hai rāhoñ meñ aaj to kyā hai

qadam qadam kabhī jannat-nishān merā thā

milā jo nutq use baT gayā hazāroñ meñ

vo jab talak bhī rahā be-zabān merā thā

maiñ chehrā chehrā use DhūñDhtā rahā lekin

vo sāmne thā ajab imtihān merā thā

jahāñ meñ aaj huuñ maqtūl-e-be-gunāh 'nazīr'

har ek shaḳhs vahāñ pāsbān merā thā

zamin meri thi aur aasman mera tha

ye kal ki baat hai sara jahan mera tha

jahan se rah nikali hai aaj logon ne

isi saDak ke kinare makan mera tha

main aaj sae ki hasrat liye bhaTakta hun

bulandiyon pe kabhi saeban mera tha

dahakti ret hai rahon mein aaj to kya hai

qadam qadam kabhi jannat-nishan mera tha

mila jo nutq use baT gaya hazaron mein

wo jab talak bhi raha be-zaban mera tha

main chehra chehra use DhunDhta raha lekin

wo samne tha ajab imtihan mera tha

jahan mein aaj hun maqtul-e-be-gunah 'nazir'

har ek shaKHs wahan pasban mera tha