zamin nadiyan falak sagar sitare sath rahte hain

zamīñ nadiyāñ falak sāgar sitāre saath rahte haiñ

kisī ke hijr ke maare ye saare saath rahte haiñ

dar-o-dīvār se ab minnat-e-hijrat nahīñ karnā

nazar ke juz bhī nazroñ meñ nazāre saath rahte haiñ

yahāñ aanā to koī dūsrī sūrat nahīñ laanā

tumhāre rāzdāñ bhī kuchh hamāre saath rahte haiñ

falak ke ba.ad hai kuchh na zamīñ se peshtar kuchh hai

ḳhudāyā phir kahāñ tere dulāre saath rahte haiñ

phir us ke ba.ad ruk jaate haiñ ye be-laus donoñ gaam

samundar tak hī nadiyoñ ke kināre saath rahte haiñ

koī bhī ġham guzar jaa.e na dil ko chhū ke is Dar se

tere ġham-ḳhvār bin tere pukāre saath rahte haiñ

jahāñ ke shauq meñ jis ghar ko jangal kah diyā tum ne

usī ghar meñ jahāñ ke isti.āre saath rahte haiñ

zamin nadiyan falak sagar sitare sath rahte hain

kisi ke hijr ke mare ye sare sath rahte hain

dar-o-diwar se ab minnat-e-hijrat nahin karna

nazar ke juz bhi nazron mein nazare sath rahte hain

yahan aana to koi dusri surat nahin lana

tumhaare raazdan bhi kuchh hamare sath rahte hain

falak ke baad hai kuchh na zamin se peshtar kuchh hai

KHudaya phir kahan tere dulare sath rahte hain

phir us ke baad ruk jate hain ye be-laus donon gam

samundar tak hi nadiyon ke kinare sath rahte hain

koi bhi gham guzar jae na dil ko chhu ke is Dar se

tere gham-KHwar bin tere pukare sath rahte hain

jahan ke shauq mein jis ghar ko jangal kah diya tum ne

usi ghar mein jahan ke istiare sath rahte hain