zamin ne kar diya is tarah raegan mujhko

zamīñ ne kar diyā is tarah rā.egāñ mujh ko

nazar na aayā kabhī dard aur dhuāñ mujh ko

talāsh kartā hai ik dūsrā jahāñ mujh ko

adhūrā lagtā hai ye jaan kā ziyāñ mujh ko

bichhe hue haiñ tasalsul se jalte bujhte charāġh

hujūm-e-lāla-o-gul le gayā kahāñ mujh ko

bhaTak rahe haiñ nazar meñ nuqūsh-e-gard-o-bād

jagā ke chhoḌ ga.e pā-e-raftagāñ mujh ko

ḳhud apnī lauh-e-tamannā pe khil ke dekhūñgā

kisī ke jabr ne likkhā thā rā.egāñ mujh ko

ye kis ke izn-o-razā se bahak rahe haiñ badan

fareb-rañg na de paayā ye jahāñ mujh ko

sivā-e-huzn-o-hazīmat jagah nahīñ dil meñ

agar vo pher bhī de lashkar-o-nishāñ mujh ko

kisī ke bas meñ nahīñ hai kushād-e-qalb-o-nigāh

milā thā apnī hī qismat kā sā.ebāñ mujh ko

haTe ye ġhāza-e-shab-rañg to use dekhūñ

pasand hī nahīñ ā.īna darmiyāñ mujh ko

tamām bār-e-alam daf.atan girā sar se

ye rāste meñ milā kaun nā-gahāñ mujh ko

zamin ne kar diya is tarah raegan mujh ko

nazar na aaya kabhi dard aur dhuan mujh ko

talash karta hai ek dusra jahan mujh ko

adhura lagta hai ye jaan ka ziyan mujh ko

bichhe hue hain tasalsul se jalte bujhte charagh

hujum-e-lala-o-gul le gaya kahan mujh ko

bhaTak rahe hain nazar mein nuqush-e-gard-o-baad

jaga ke chhoD gae pa-e-raftagan mujh ko

KHud apni lauh-e-tamanna pe khil ke dekhunga

kisi ke jabr ne likkha tha raegan mujh ko

ye kis ke izn-o-raza se bahak rahe hain badan

fareb-rang na de paya ye jahan mujh ko

siwa-e-huzn-o-hazimat jagah nahin dil mein

agar wo pher bhi de lashkar-o-nishan mujh ko

kisi ke bas mein nahin hai kushad-e-qalb-o-nigah

mila tha apni hi qismat ka saeban mujh ko

haTe ye ghaza-e-shab-rang to use dekhun

pasand hi nahin aaina darmiyan mujh ko

tamam bar-e-alam dafatan gira sar se

ye raste mein mila kaun na-gahan mujh ko