زمیں پر حشر کچھ ایسا بپا ہے

زمیں پر حشر کچھ ایسا بپا ہے

ہر انساں اپنے اندر چھپ گیا ہے

فضاؤں میں ہر اک سو روشنی ہے

نہ جانے آج کس کا گھر جلا ہے

اسے کوشش میں پڑھنے کی لگا ہوں

ورق جو میرے دل نے لکھ دیا ہے

نظر آتی نہیں ہے شکل کوئی

بس اک سایا خلا میں چل رہا ہے

دئے ہیں اپنے پن نے زخم اتنے

کوئی ہنس کر ملے دل کانپتا ہے

وہی اک یاد جو دل میں بسی تھی

وہی تو اب مرے دل کی دوا ہے

خلش تڑپا رہی تھی کب سے عادلؔ

نشان‌ زخم اب جا کر ملا ہے