zamin par raushni hi raushni hai

zamīñ par raushnī hī raushnī hai

ḳhalā meñ ik kiran gum ho ga.ī hai

maiñ tanhā jā rahā huuñ sū-e-manzil

ye parchhā.īñ kahāñ se aa rahī hai

ye shaam aur raushnī kī ye qatāreñ

udāsī aur gahrī ho ga.ī hai

urūj-e-māh hai aur maqbaroñ par

abad kī chāñdnī chaTkī huī hai

ubhār ai mauj-e-tūfāñ-ḳhez mujh ko

ye kashtī ret meñ Duubī huī hai

havā se hai kalī jumbāñ sar-e-shāḳh

ye kin hāthoñ meñ neze kī anī hai

girā hai shāḳh-e-gul se ek pata

kisī ne kyā mujhe āvāz dī hai

zamin par raushni hi raushni hai

KHala mein ek kiran gum ho gai hai

main tanha ja raha hun su-e-manzil

ye parchhain kahan se aa rahi hai

ye sham aur raushni ki ye qataren

udasi aur gahri ho gai hai

uruj-e-mah hai aur maqbaron par

abad ki chandni chaTki hui hai

ubhaar ai mauj-e-tufan-KHez mujh ko

ye kashti ret mein Dubi hui hai

hawa se hai kali jumban sar-e-shaKH

ye kin hathon mein neze ki ani hai

gira hai shaKH-e-gul se ek pata

kisi ne kya mujhe aawaz di hai