زمیں پہ دھوپ ہے بھوجن ہے جل ہوا بھی ہے

زمیں پہ دھوپ ہے بھوجن ہے جل ہوا بھی ہے

یہاں بشر ہے تو بے شک کہیں خدا بھی ہے

کہوں میں کیا کہ نگاہوں نے سب کہا بھی ہے

جو میرے دل میں ہے وہ آپ کو پتہ بھی ہے

وہ مانتا ہی نہیں مجھ سے واسطہ بھی ہے

پھر اس کے بعد وہ حسرت سے دیکھتا بھی ہے

اسی لئے وہ مرے دل سے کھیلتا بھی ہے

وہ جانتا ہے وہی درد ہے دوا بھی ہے

مصیبتوں میں مرے ساتھ وہ رہا بھی ہے

مگر یقیں نہیں آتا وہ بے وفا بھی ہے

بہانا آپ کا اچھا ہے اور نیا بھی ہے

مگر یہ کہہ نہیں سکتے کہ کام کا بھی ہے

بچھڑتے وقت دل اکثر یہ سوچتا بھی ہے

یہ کیسی قربتیں ہیں جن میں فاصلہ بھی ہے

یہ وجہ کم تو نہیں چاہنے کی اس کو کہ وہ

بہت حسین ہے اس پر غزل سرا بھی ہے

نہ یوں ہتاش ہو تم حوصلہ رکھو نیرجؔ

کہیں اگر جو ہے منزل تو راستہ بھی ہے