zamin pe dhup hai bhojan hai jal hawa bhi hai

zamīñ pe dhuup hai bhojan hai jal havā bhī hai

yahāñ bashar hai to be-shak kahīñ ḳhudā bhī hai

kahūñ maiñ kyā ki nigāhoñ ne sab kahā bhī hai

jo mere dil meñ hai vo aap ko pata bhī hai

vo māntā hī nahīñ mujh se vāsta bhī hai

phir is ke baa'd vo hasrat se dekhtā bhī hai

isī liye vo mire dil se kheltā bhī hai

vo jāntā hai vahī dard hai davā bhī hai

musībatoñ meñ mire saath vo rahā bhī hai

magar yaqīñ nahīñ aatā vo bevafā bhī hai

bahānā aap kā achchhā hai aur nayā bhī hai

magar ye kah nahīñ sakte ki kaam kā bhī hai

bichhaḌte vaqt dil aksar ye sochtā bhī hai

ye kaisī qurbateñ haiñ jin meñ fāsla bhī hai

ye vaj.h kam to nahīñ chāhne kī us ko ki vo

bahut hasīn hai us par ġhazal-sarā bhī hai

na yuuñ hatāsh ho tum hausla rakho 'nīraj'

kahīñ agar jo hai manzil to rāsta bhī hai

zamin pe dhup hai bhojan hai jal hawa bhi hai

yahan bashar hai to be-shak kahin KHuda bhi hai

kahun main kya ki nigahon ne sab kaha bhi hai

jo mere dil mein hai wo aap ko pata bhi hai

wo manta hi nahin mujh se wasta bhi hai

phir is ke ba'd wo hasrat se dekhta bhi hai

isi liye wo mere dil se khelta bhi hai

wo jaanta hai wahi dard hai dawa bhi hai

musibaton mein mere sath wo raha bhi hai

magar yaqin nahin aata wo bewafa bhi hai

bahana aap ka achchha hai aur naya bhi hai

magar ye kah nahin sakte ki kaam ka bhi hai

bichhaDte waqt dil aksar ye sochta bhi hai

ye kaisi qurbaten hain jin mein fasla bhi hai

ye wajh kam to nahin chahne ki us ko ki wo

bahut hasin hai us par ghazal-sara bhi hai

na yun hatash ho tum hausla rakho 'niraj'

kahin agar jo hai manzil to rasta bhi hai