zamin se aasman tak ya makan se la-makan tak hai

zamīñ se āsmāñ tak yā makāñ se lā-makāñ tak hai

jamāl-e-yār kā partav ḳhudā jaane kahāñ tak hai

chaman meñ bijliyo kuchh aur bhī to āshiyāne haiñ

magar saarā tabassum sirf mere āshiyāñ tak hai

mire shor-e-junūñ se husn kī hai garm-bāzārī

tajallī sham.a kī parvāna-e-ātish-ba-jāñ tak hai

nishāt-e-jāvedāñ hotā hai hāsil be-niyāzī se

vajūd-e-ranj-o-ġham andesha-e-sūd-o-ziyāñ tak hai

nigāh-e-shauq kī gustāḳhiyāñ kar deñgī shoḳh un ko

hameñ bhī dekhnā hai sharm kī vus.at kahāñ tak hai

jo haiñ be-ḳhānumāñ un ko surūr-e-zindagī kyā ho

maza gulshan meñ rahne kā vajūd-e-āshiyāñ tak hai

safīne ġharq lākhoñ ho ga.e bahr-e-mohabbat meñ

ḳhudā ma.alūm is dariyā kī gahrā.ī kahāñ tak hai

ta.ammul kyā hai kar le bai.at-e-dast-e-subū zāhid

ḳhabar bhī hai ki is kā silsila pīr-e-muġhāñ tak hai

mire miTte hī miT jā.egī shān-e-barhamī terī

tire ḳhanjar kī shoḳhī mere zaḳhm-e-ḳhūñ-chukā tak hai

junūn-e-shauq se idrāk hogā un ke jalve kā

ḳhirad kī kār-farmā.ī faqat vahm-o-gumāñ tak hai

'valī' do ek saa.at meñ likhī āḳhir ġhazal tū ne

tire fikr-e-falak-paimā kī jaulānī yahāñ tak hai

zamin se aasman tak ya makan se la-makan tak hai

jamal-e-yar ka partaw KHuda jaane kahan tak hai

chaman mein bijliyo kuchh aur bhi to aashiyane hain

magar sara tabassum sirf mere aashiyan tak hai

mere shor-e-junun se husn ki hai garm-bazari

tajalli shama ki parwana-e-atish-ba-jaan tak hai

nishat-e-jawedan hota hai hasil be-niyazi se

wajud-e-ranj-o-gham andesha-e-sud-o-ziyan tak hai

nigah-e-shauq ki gustaKHiyan kar dengi shoKH un ko

hamein bhi dekhna hai sharm ki wusat kahan tak hai

jo hain be-KHanuman un ko surur-e-zindagi kya ho

maza gulshan mein rahne ka wajud-e-ashiyan tak hai

safine gharq lakhon ho gae bahr-e-mohabbat mein

KHuda malum is dariya ki gahrai kahan tak hai

tammul kya hai kar le baiat-e-dast-e-subu zahid

KHabar bhi hai ki is ka silsila pir-e-mughan tak hai

mere miTte hi miT jaegi shan-e-barhami teri

tere KHanjar ki shoKHi mere zaKHm-e-KHun-chuka tak hai

junun-e-shauq se idrak hoga un ke jalwe ka

KHirad ki kar-farmai faqat wahm-o-guman tak hai

'wali' do ek saat mein likhi aaKHir ghazal tu ne

tere fikr-e-falak-paima ki jaulani yahan tak hai