zamin se arsh talak silsila hamara bhi tha

zamīñ se arsh talak silsila hamārā bhī thā

ki chashm-e-ḳhāk meñ ik ḳhvāb sā hamārā bhī thā

tū apne ghar kī taraf moḌ le gayā hai jise

zamīñ se pūchh ki ye rāsta hamārā bhī thā

ye sab charāġh jalā.e hue hamāre bhī haiñ

balā-e-shab kā kabhī sāmnā hamārā bhī thā

hamāre paañv bhī paḌte na the zamīñ pe kabhī

kabhī kahīñ yahī taḳht-e-havā hamārā bhī thā

ye haiñ jo baaġh meñ bos-o-kanār ke manzar

ga.e dinoñ meñ yahī mashġhala hamārā bhī thā

kisī kī zulf meñ dekhā to ham ko yaad aayā

ki ek phuul usī rañg kā hamārā bhī thā

yahī sharāb kabhī ham bhī ḳhuub piite the

usī nashe meñ sar uḌtā huā hamārā bhī thā

zamīn hiltī thī yuuñ hī hamāre aane se bhī

isī tarah kā kabhī zalzala hamārā bhī thā

jo ab tumhāre tasarruf meñ hai miyāñ-'ehsās'

kabhī ye arsa-e-arz-o-samāñ hamārā bhī thā

zamin se arsh talak silsila hamara bhi tha

ki chashm-e-KHak mein ek KHwab sa hamara bhi tha

tu apne ghar ki taraf moD le gaya hai jise

zamin se puchh ki ye rasta hamara bhi tha

ye sab charagh jalae hue hamare bhi hain

bala-e-shab ka kabhi samna hamara bhi tha

hamare panw bhi paDte na the zamin pe kabhi

kabhi kahin yahi taKHt-e-hawa hamara bhi tha

ye hain jo bagh mein bos-o-kanar ke manzar

gae dinon mein yahi mashghala hamara bhi tha

kisi ki zulf mein dekha to hum ko yaad aaya

ki ek phul usi rang ka hamara bhi tha

yahi sharab kabhi hum bhi KHub pite the

usi nashe mein sar uDta hua hamara bhi tha

zamin hilti thi yun hi hamare aane se bhi

isi tarah ka kabhi zalzala hamara bhi tha

jo ab tumhaare tasarruf mein hai miyan-'ehsas'

kabhi ye arsa-e-arz-o-saman hamara bhi tha