zamin se dur rahe aasman se dur rahe

zamīñ se duur rahe āsmāñ se duur rahe

jo tum the paas to saare jahāñ se duur rahe

jo ashk-e-ġham mizha-e-ḳhūñ-fishāñ se duur rahe

fasāna ban ga.e lafz-o-bayāñ se duur rahe

vo kyā batā.eñ bahāroñ kī hashr-sāmānī

jo tā.irān-e-qafas gulsitāñ se duur rahe

sitam-zarīfī-e-fitrat vo mīr-e-manzil haiñ

vahī jo gard-e-rah-e-kārvāñ se duur rahe

ghaTā sakā na zamāna diloñ kī qurbat ko

tumhāre paas rahe āstāñ se duur rahe

vo daur asl meñ jān-e-ġhazal-sarā.ī thā

vo daur jis meñ ki ham āshiyāñ se duur rahe

nazar se duurī kā 'ehsās' itnā ġham to na thā

malāl ye hai dil-e-dostāñ se duur rahe

zamin se dur rahe aasman se dur rahe

jo tum the pas to sare jahan se dur rahe

jo ashk-e-gham mizha-e-KHun-fishan se dur rahe

fasana ban gae lafz-o-bayan se dur rahe

wo kya bataen bahaaron ki hashr-samani

jo tairan-e-qafas gulsitan se dur rahe

sitam-zarifi-e-fitrat wo mir-e-manzil hain

wahi jo gard-e-rah-e-karwan se dur rahe

ghaTa saka na zamana dilon ki qurbat ko

tumhaare pas rahe aastan se dur rahe

wo daur asl mein jaan-e-ghazal-sarai tha

wo daur jis mein ki hum aashiyan se dur rahe

nazar se duri ka 'ehsas' itna gham to na tha

malal ye hai dil-e-dostan se dur rahe