زمیں سے دور ستاروں کے درمیاں روشن

زمیں سے دور ستاروں کے درمیاں روشن

سیاہ رات میں کب سے ہے کہکشاں روشن ہے

شفق مثال لہو رنگ میری خاک ہوئی

عزا کی شام ہوا میرا اشک داں روشن

نشیب حزن میں شام سیاہ بخت کٹی

پھر اک چراغ ہوا شب پہ مہرباں روشن

یہیں کہیں تھا اندھیرے میں معبد زرتشت

قدیم آگ سے ہیں مشعلیں جہاں روشن

برہنگی نے بھی روکا نہ ارشمیدس کو

عجب گھڑی تھی ہوئی فکر نکتہ داں روشن

سفر نصیب ہوں میں ماہ نیم ماہ کی شب

چراغ کہنہ سے ہے طاق آسماں روشن

ستارہ ہو کہ پرندہ کوئی خبر لائے

ہمیشگی میں ہے کیا قصر لامکاں روشن