zamin se dur sitaron ke darmiyan raushan

zamīñ se duur sitāroñ ke darmiyāñ raushan

siyāh raat meñ kab se hai kahkashāñ raushan hai

shafaq-misāl lahū-rang merī ḳhaak huī

'azā kī shaam huā merā ashk-dāñ raushan

nasheb-e-huzn meñ shām-e-siyāh-baḳht kaTī

phir ik charāġh huā shab pe mehrbāñ raushan

yahīñ kahīñ thā añdhere meñ mā'bad-e-zartusht

qadīm aag se haiñ mash'aleñ jahāñ raushan

barahnagī ne bhī rokā na archimedes ko

'ajab ghaḌī thī huī fikr-e-nukta-dāñ raushan

safar-nasīb huuñ maiñ māh-e-nīm-māh kī shab

charāġh-e-kohna se hai tāq-e-āsmāñ raushan

sitāra ho ki parinda koī ḳhabar laa.e

hameshgī meñ hai kyā qasr-e-lā-makāñ raushan

zamin se dur sitaron ke darmiyan raushan

siyah raat mein kab se hai kahkashan raushan hai

shafaq-misal lahu-rang meri KHak hui

'aza ki sham hua mera ashk-dan raushan

nasheb-e-huzn mein sham-e-siyah-baKHt kaTi

phir ek charagh hua shab pe mehrban raushan

yahin kahin tha andhere mein ma'bad-e-zartusht

qadim aag se hain mash'alen jahan raushan

barahnagi ne bhi roka na archimedes ko

'ajab ghaDi thi hui fikr-e-nukta-dan raushan

safar-nasib hun main mah-e-nim-mah ki shab

charagh-e-kohna se hai taq-e-asman raushan

sitara ho ki parinda koi KHabar lae

hameshgi mein hai kya qasr-e-la-makan raushan