zamin se guzre hain ya aasman se guzre hain

zamīñ se guzre haiñ yā āsmāñ se guzre haiñ

jahāñ ko saath liyā hai jahāñ se guzre haiñ

huā chaman meñ phir elān-e-āshiyāñ-bandī

abhī kī baat hai ik imtihāñ se guzre haiñ

ba-josh-e-sa.ī-e-baġhāvat zamīñ ke ye zarre

hazāroñ baar sar-e-āsmāñ se guzre haiñ

vahīñ ulajh se ga.e haiñ vahīñ ThiThuk se ga.e

nigāheñ apnī bachā kar jahāñ se guzre haiñ

na pūchhiye kashish-e-manzil-e-ġham-e-jānāñ

yahīñ ke ho ga.e jo bhī yahāñ se guzre haiñ

qadam qadam meñ hamāre hai jazba-e-taḳhlīq

vahīñ ubhār dī manzil jahāñ se guzre haiñ

'shifā' baḌho ki ufuq-dar-nazar rajaz-bar-lab

shafaq kī aaḌ meñ kuchh kārvāñ se guzre haiñ

zamin se guzre hain ya aasman se guzre hain

jahan ko sath liya hai jahan se guzre hain

hua chaman mein phir elan-e-ashiyan-bandi

abhi ki baat hai ek imtihan se guzre hain

ba-josh-e-sai-e-baghawat zamin ke ye zarre

hazaron bar sar-e-asman se guzre hain

wahin ulajh se gae hain wahin ThiThuk se gae

nigahen apni bacha kar jahan se guzre hain

na puchhiye kashish-e-manzil-e-gham-e-jaanan

yahin ke ho gae jo bhi yahan se guzre hain

qadam qadam mein hamare hai jazba-e-taKHliq

wahin ubhaar di manzil jahan se guzre hain

'shifa' baDho ki ufuq-dar-nazar rajaz-bar-lab

shafaq ki aaD mein kuchh karwan se guzre hain