zamin se uTThi hai ya charKH par se utri hai

zamīñ se uTThī hai yā charḳh par se utrī hai

ye aag ishq kī yārab kidhar se utrī hai

utartī najd meñ kab thī savārī-e-lailā

Tuk aah qais ke jazb-e-asar se utrī hai

nahīñ nasīm-e-bahārī ye hai parī koī

uḌan-khaTole ko Thahrā jo far se utrī hai

na jaan is ko shab-e-mah ye chāñdnī-ḳhānam

kamand-e-nūr pe auj-e-qamar se utrī hai

chalo na dekheñ to kahte haiñ dasht-e-vahshat meñ

junūñ kī fauj baḌe karr-o-farr se utrī hai

nahīñ ye ishq tajallī hai haq-ta.ālā kī

jo raah zīna-e-bām-e-nazar se utrī hai

libās-e-āh meñ likhne ke vāste 'inshā'

qalam davāt tujhe arsh par se utrī hai

zamin se uTThi hai ya charKH par se utri hai

ye aag ishq ki yarab kidhar se utri hai

utarti najd mein kab thi sawari-e-laila

Tuk aah qais ke jazb-e-asar se utri hai

nahin nasim-e-bahaari ye hai pari koi

uDan-khaTole ko Thahra jo far se utri hai

na jaan is ko shab-e-mah ye chandni-KHanam

kamand-e-nur pe auj-e-qamar se utri hai

chalo na dekhen to kahte hain dasht-e-wahshat mein

junun ki fauj baDe karr-o-farr se utri hai

nahin ye ishq tajalli hai haq-taala ki

jo rah zina-e-baam-e-nazar se utri hai

libas-e-ah mein likhne ke waste 'insha'

qalam dawat tujhe arsh par se utri hai