zamin se zer hua hun na aasman se main

zamīñ se zer huā huuñ na āsmāñ se maiñ

bañdhā huā huuñ muqaddar ke bādbāñ se maiñ

lipaT ke ro.egā pindār-e-be-karāñ mujh se

pukārā jā.uñgā fihrist-e-raftagāñ se maiñ

mire ḳhudā ko hī jab mujh pe e'tibār nahīñ

nikal na jā.ūñ farishtoñ ke darmiyāñ se maiñ

mire liye the sabhī saañp bā’is-e-rahmat

vo āstīn se nikle to āstāñ se maiñ

visāl-o-hijr se baḌh kar bhī laakh ġham haiñ mujhe

nikāl dūñgā mohabbat ko dāstāñ se maiñ

zamāne-bhar ke 'azāboñ ne mujh ko gher liyā

judā huā huuñ juuñ hī 'shams' apnī maañ se maiñ

zamin se zer hua hun na aasman se main

bandha hua hun muqaddar ke baadban se main

lipaT ke roega pindar-e-be-karan mujh se

pukara jaunga fihrist-e-raftagan se main

mere KHuda ko hi jab mujh pe e'tibar nahin

nikal na jaun farishton ke darmiyan se main

mere liye the sabhi sanp ba’is-e-rahmat

wo aastin se nikle to aastan se main

visal-o-hijr se baDh kar bhi lakh gham hain mujhe

nikal dunga mohabbat ko dastan se main

zamane-bhar ke 'azabon ne mujh ko gher liya

juda hua hun jun hi 'shams' apni man se main