zamin tak hi nahin charcha tera ab aasman tak hai

zamīñ tak hī nahīñ charchā tirā ab āsmāñ tak hai

kabhī to soch dil meñ jor kī shohrat kahāñ tak hai

na jaane is qadar sahme hue haiñ kyoñ chaman vaale

rasā.ī barq-e-sozāñ kī to mere āshiyāñ tak hai

mirī taqlīd se rashk-e-qamar kahte haiñ sab tum ko

tumhāre husn kā charchā mire husn-e-bayāñ tak hai

idhar bechārgī meñ dil bhī dushman ho gayā apnā

udhar jaur-o-jafā meñ un kā sāthī āsmāñ tak hai

tumhārā bār-e-ehsāñ bhī uThāne ke liye nahīñ baaqī

tumhāre nā-tavāñ kī nā-tavānī ab yahāñ tak hai

junūñ kī kār-farmā.ī ko ye hargiz na samjhegī

rasā.ī aql kī andesha-e-sūd-o-ziyāñ tak hai

sañbhal jā ai dil-e-nādāñ abhī tak kuchh nahīñ bigḌā

abhī to raaz ulfat kā ḳhamoshī kī zabāñ tak hai

kabhī hai jaan ḳhatre meñ kabhī īmān ḳhatre meñ

butoñ kī mehrbānī mujh pe 'sāhir' ab yahāñ tak hai

zamin tak hi nahin charcha tera ab aasman tak hai

kabhi to soch dil mein jor ki shohrat kahan tak hai

na jaane is qadar sahme hue hain kyon chaman wale

rasai barq-e-sozan ki to mere aashiyan tak hai

meri taqlid se rashk-e-qamar kahte hain sab tum ko

tumhaare husn ka charcha mere husn-e-bayan tak hai

idhar bechaargi mein dil bhi dushman ho gaya apna

udhar jaur-o-jafa mein un ka sathi aasman tak hai

tumhaara bar-e-ehsan bhi uThane ke liye nahin baqi

tumhaare na-tawan ki na-tawani ab yahan tak hai

junun ki kar-farmai ko ye hargiz na samjhegi

rasai aql ki andesha-e-sud-o-ziyan tak hai

sanbhal ja ai dil-e-nadan abhi tak kuchh nahin bigDa

abhi to raaz ulfat ka KHamoshi ki zaban tak hai

kabhi hai jaan KHatre mein kabhi iman KHatre mein

buton ki mehrbani mujh pe 'sahir' ab yahan tak hai