zamin tashkil de lete falak tamir kar lete

zamīñ tashkīl de lete falak ta.amīr kar lete

ham apne aap meñ hote to sab taqdīr kar lete

inhī rāhoñ pe chalne kī koī tadbīr kar lete

agarche ḳhaak uḌtī, ḳhaak ko iksīr kar lete

nahīñ thā sar meñ saudā bām-o-dar kā is qadar varna

zamāna dekhtā kyā kyā na ham ta.amīr kar lete

ye mohlat bhī baḌī shai thī hameñ ai kaash mil jaatī

kisī din baiThte kār-e-jahāñ tahrīr kar lete

ḳhalish baaqī na hotī to bhalā kyā lutf rah jaatā

tujhe tasḳhīr karnā chāhte tasḳhīr kar lete

nahīñ guftār kī lazzat ye jazbe kī karāmat hai

agar jazba nahīñ hotā to kyā taqrīr kar lete

mohabbat meñ junūñ kī barkateñ shāmil jo ho jātīñ

adhūre ḳhvāb the puurī magar ta.abīr kar lete

zamin tashkil de lete falak tamir kar lete

hum apne aap mein hote to sab taqdir kar lete

inhi rahon pe chalne ki koi tadbir kar lete

agarche KHak uDti, KHak ko iksir kar lete

nahin tha sar mein sauda baam-o-dar ka is qadar warna

zamana dekhta kya kya na hum tamir kar lete

ye mohlat bhi baDi shai thi hamein ai kash mil jati

kisi din baiThte kar-e-jahan tahrir kar lete

KHalish baqi na hoti to bhala kya lutf rah jata

tujhe tasKHir karna chahte tasKHir kar lete

nahin guftar ki lazzat ye jazbe ki karamat hai

agar jazba nahin hota to kya taqrir kar lete

mohabbat mein junun ki barkaten shamil jo ho jatin

adhure KHwab the puri magar tabir kar lete