zamin thi saKHt mujhe koi naqsh-e-pa na mila

zamīñ thī saḳht mujhe koī naqsh-e-pā na milā

tirī galī se jo niklā to rāsta na milā

duā thī chīḳh thī yā ehtijāj thā kyā thā

hile the hoñT magar harf-e-mudda.ā na milā

badan kī qaid se chhūTā to log pahchāne

tamām-umr kisī ko mirā patā na milā

maiñ chāhtā thā ki tevar bhī dekh le mere

ġhanīm jab bhī milā mujh se ġhā.ebāna milā

nafas nafas koī mujh ko pukārtā kyuuñ hai

nazar ko jab ki basārat kā zā.iqa na milā

ye bazm-e-sh.er-o-adab hai ki kūcha-e-bad-nām

yahāñ to jo bhī milā hai munāfiqāna milā

mile haiñ yuuñ to bahut tishnagī ke dasht 'ziyā'

koī bhī dasht magar misl-e-karbalā na milā

zamin thi saKHt mujhe koi naqsh-e-pa na mila

teri gali se jo nikla to rasta na mila

dua thi chiKH thi ya ehtijaj tha kya tha

hile the honT magar harf-e-muddaa na mila

badan ki qaid se chhuTa to log pahchane

tamam-umr kisi ko mera pata na mila

main chahta tha ki tewar bhi dekh le mere

ghanim jab bhi mila mujh se ghaebana mila

nafas nafas koi mujh ko pukarta kyun hai

nazar ko jab ki basarat ka zaiqa na mila

ye bazm-e-sher-o-adab hai ki kucha-e-bad-nam

yahan to jo bhi mila hai munafiqana mila

mile hain yun to bahut tishnagi ke dasht 'ziya'

koi bhi dasht magar misl-e-karbala na mila