zamin thi tang khula aasman kya rakhte

zamīñ thī tañg khulā āsmān kyā rakhte

ham apne sar pe koī sā.ebān kyā rakhte

bahut tavīl thā anjān chāhatoñ kā safar

ki chal rahe the musalsal takān kyā rakhte

jahāñ bhī chhāñv nazar aa ga.ī paḌāv kiyā

ik umr dasht meñ guzrī makān kyā rakhte

na hotā ḳhuun hamārā jo rañg-o-nik.hat meñ

ye phuul chehre bhalā ān-bān kyā rakhte

bhunā rahe haiñ jo aslāf ke usūloñ ko

vo apnā nām-o-nasab ḳhāndān kyā rakhte

jhulas ga.e the tamāzat se bāl-o-par jin ke

vo bad-nasīb parinde uḌaan kyā rakhte

zamin thi tang khula aasman kya rakhte

hum apne sar pe koi saeban kya rakhte

bahut tawil tha anjaan chahaton ka safar

ki chal rahe the musalsal takan kya rakhte

jahan bhi chhanw nazar aa gai paDaw kiya

ek umr dasht mein guzri makan kya rakhte

na hota KHun hamara jo rang-o-nikhat mein

ye phul chehre bhala aan-ban kya rakhte

bhuna rahe hain jo aslaf ke usulon ko

wo apna nam-o-nasab KHandan kya rakhte

jhulas gae the tamazat se baal-o-par jin ke

wo bad-nasib parinde uDan kya rakhte