زمین والوں پہ کیا کیا ستم نہیں ہوتا

زمین والوں پہ کیا کیا ستم نہیں ہوتا

یہ آسمان مگر زیر و بم نہیں ہوتا

میں تیرے سامنے ہوں مثل ماہیٔ بے آب

تو ریگزار ہے اشکوں سے نم نہیں ہوتا

سکوت نیم شبی میں چراغ بولیں گے

ہوا کے شور میں اظہار غم نہیں ہوتا

فریب کھایا ہے برباد ہو گیا لیکن

یہ میرا کار مسیحائی کم نہیں ہوتا

مری طرف جو حقارت سے پھینک دیتے ہو

وہ تلخ لقمہ سپرد شکم نہیں ہوتا

ہزار بار میں سمجھا چکا ہوں اس دل کو

یہ محتشم سر تسلیم خم نہیں ہوتا

میں پیچ دار بجھارت ہوں خود ہی اپنے لئے

یہ فاصلہ ہی مرا خود سے کم نہیں ہوتا