zamin walon pe kya kya sitam nahin hota

zamīn vāloñ pe kyā kyā sitam nahīñ hotā

ye āsmān magar zer-o-bam nahīñ hotā

maiñ tere sāmne huuñ misl-e-māhī-e-be-āb

tū regzār hai ashkoñ se nam nahīñ hotā

sukūt-e-nīm-shabī meñ charāġh boleñge

havā ke shor meñ iz.hār-e-ġham nahīñ hotā

fareb khāyā hai barbād ho gayā lekin

ye merā kār-e-masīhā.ī kam nahīñ hotā

mirī taraf jo haqārat se pheñk dete ho

vo talḳh luqma sipurd-e-shikam nahīñ hotā

hazār baar maiñ samjhā chukā huuñ is dil ko

ye muhtasham sar-e-taslīm ḳham nahīñ hotā

maiñ pechdār bujhārat huuñ ḳhud hī apne liye

ye fāsla hī mirā ḳhud se kam nahīñ hotā

zamin walon pe kya kya sitam nahin hota

ye aasman magar zer-o-bam nahin hota

main tere samne hun misl-e-mahi-e-be-ab

tu regzar hai ashkon se nam nahin hota

sukut-e-nim-shabi mein charagh bolenge

hawa ke shor mein izhaar-e-gham nahin hota

fareb khaya hai barbaad ho gaya lekin

ye mera kar-e-masihai kam nahin hota

meri taraf jo haqarat se phenk dete ho

wo talKH luqma sipurd-e-shikam nahin hota

hazar bar main samjha chuka hun is dil ko

ye muhtasham sar-e-taslim KHam nahin hota

main pechdar bujhaarat hun KHud hi apne liye

ye fasla hi mera KHud se kam nahin hota