zamir-o-zehan se ki hain baghawaten kya kya

zamīr-o-zehan se kī haiñ baġhāvateñ kyā kyā

munāfiqoñ se nibhā.īñ rifāqateñ kyā kyā

hayāt arsa-e-karb-o-balā meñ guzrī hai

tamām-umr huī haiñ shahādateñ kyā kyā

kisī se pyaar kisī se vafā kisī se ḳhulūs

bigaḌ ga.ī haiñ hamārī bhī ādateñ kyā kyā

ye jabr hai ki ġharaz se ġharaz badalte haiñ

hameñ aziiz thiiñ varna sharāfateñ kyā kyā

mizāj-e-vaqt ne chhīnā hai mujh se merā mizāj

guzartī rahtī haiñ dil par qayāmateñ kyā kyā

sabā pe harf na aa.e kiran kā dil na dukhe

shagufta gul ke liye haiñ nazākateñ kyā kyā

ye aur baat samajhne se ham haiñ qāsir 'lais'

jabīn-e-vaqt par dekhīñ ibārateñ kyā kyā

zamir-o-zehan se ki hain baghawaten kya kya

munafiqon se nibhain rifaqaten kya kya

hayat arsa-e-karb-o-bala mein guzri hai

tamam-umr hui hain shahadaten kya kya

kisi se pyar kisi se wafa kisi se KHulus

bigaD gai hain hamari bhi aadaten kya kya

ye jabr hai ki gharaz se gharaz badalte hain

hamein aziz thin warna sharafaten kya kya

mizaj-e-waqt ne chhina hai mujh se mera mizaj

guzarti rahti hain dil par qayamaten kya kya

saba pe harf na aae kiran ka dil na dukhe

shagufta gul ke liye hain nazakaten kya kya

ye aur baat samajhne se hum hain qasir 'lais'

jabin-e-waqt par dekhin ibaraten kya kya