zamzama-e-ah-o-fughan dur tak

zamzama-e-āh-o-fuġhāñ duur tak

gūñjtī hai vādī-e-jāñ duur tak

haa.e re vīrānī-e-rāh-e-hayāt

koī sadā hai na nishāñ duur tak

mil na sakā amn-o-sukūñ kā pata

DhūñD chukī umr-e-ravāñ duur tak

sham-e-tarab jalva-fagan ās-pās

mash.al-ġham nūr-fishāñ duur tak

simTe hue amn ke paiġhāmbar

phaile hue qātil-e-jāñ duur tak

shahr meñ dehāt meñ har raah meñ

ḳhuun kī ik jū-e-ravāñ duur tak

pūchh na 'fāzil' mirī duniyā kā rañg

aag har ik samt dhuāñ duur tak

zamzama-e-ah-o-fughan dur tak

gunjti hai wadi-e-jaan dur tak

hae re virani-e-rah-e-hayat

koi sada hai na nishan dur tak

mil na saka amn-o-sukun ka pata

DhunD chuki umr-e-rawan dur tak

sham-e-tarab jalwa-fagan aas-pas

mashal-gham nur-fishan dur tak

simTe hue amn ke paighambar

phaile hue qatil-e-jaan dur tak

shahr mein dehat mein har rah mein

KHun ki ek ju-e-rawan dur tak

puchh na 'fazil' meri duniya ka rang

aag har ek samt dhuan dur tak