zanjir-e-junun kuchh aur khanak hum raqs-e-tamanna dekhenge

zanjīr-e-junūñ kuchh aur khanak ham raqs-e-tamannā dekheñge

duniyā kā tamāsha dekh chuke ab apnā tamāsha dekheñge

ik umr huī ye soch ke ham jaate hī nahīñ gulshan kī taraf

tum aur bhī yaad aaoge hameñ jab gul koī khiltā dekheñge

kyā fā.eda aise manzar se kyuuñ ḳhud hī na kar leñ band āñkheñ

itnī hī baḌhegī tishna-labī ham aap ko jitnā dekheñge

tum kyā samjho tum kyā jaano furqat meñ tumhārī dīvāne

kyā jāniye kyā kyā dekh chuke kyā jāniye kyā kyā dekheñge

hone do añdherā aaj kī shab gul kar do charāġhoñ ke chehre

ham aaj ḳhud apnī mahfil meñ dil apnā hī jaltā dekheñge

'naushād' ham un kī mahfil se is vāste uTh kar aa.e haiñ

parvānoñ kā jalnā dekh chuke ab apnā taḌapnā dekheñge

zanjir-e-junun kuchh aur khanak hum raqs-e-tamanna dekhenge

duniya ka tamasha dekh chuke ab apna tamasha dekhenge

ek umr hui ye soch ke hum jate hi nahin gulshan ki taraf

tum aur bhi yaad aaoge hamein jab gul koi khilta dekhenge

kya faeda aise manzar se kyun KHud hi na kar len band aankhen

itni hi baDhegi tishna-labi hum aap ko jitna dekhenge

tum kya samjho tum kya jaano furqat mein tumhaari diwane

kya jaaniye kya kya dekh chuke kya jaaniye kya kya dekhenge

hone do andhera aaj ki shab gul kar do charaghon ke chehre

hum aaj KHud apni mahfil mein dil apna hi jalta dekhenge

'naushad' hum un ki mahfil se is waste uTh kar aae hain

parwanon ka jalna dekh chuke ab apna taDapna dekhenge