zara bhi dam tere bimar-e-na-tawan mein nahin

zarā bhī dam tire bīmār-e-nā-tavāñ meñ nahīñ

makāñ meñ yuuñ hai ki jaise koī makāñ meñ nahīñ

vo chheḌ chheḌ ke pūchheñ na dil ke dard kā haal

kaho zabāñ se ye tāqat mirī zabāñ meñ nahīñ

chaman meñ kis ke liye bijliyāñ taḌaptī haiñ

gul āshiyāñ meñ nahīñ shāḳh āshiyāñ meñ nahīñ

tumhāre dar se uThātā hai kyoñ hameñ darbāñ

kuchh aise la.al lage sang-e-āstāñ meñ nahīñ

maiñ sar-ba-kaf huuñ vo ḳhanjar-ba-kaf haiñ maqtal meñ

ajal se kah do ki ab der imtihāñ meñ nahīñ

kareñge vo nigah-e-nāz se hadaf dil ko

chaḌhī kamān hai nāvak magar kamān meñ nahīñ

jigar ne jī jo churāyā to dil pukār uThThā

sharīk-e-hāl mirā koī imtihāñ meñ nahīñ

nazar na kī mire hāl-e-tabāh par us ne

ye kah diyā ki asar kuchh mirī fuġhāñ meñ nahīñ

masal ye ek zamāne meñ sunte aa.e haiñ

na ho makīn to raunaq koī makāñ meñ nahīñ

jo phuul aaj kaf-e-gul-farosh meñ dekhā

vo bāġhbāñ ke bhī ab vahm meñ gumāñ meñ nahīñ

ye lutf pūchhiye kuchh aap marne vāloñ se

janāb-e-ḳhizr mazā umr-e-jāvedāñ meñ nahīñ

sunā ki qissa-e-'safdar' hai dard se ḳhālī

maze kī chiiz yahī thī jo dāstāñ meñ nahīñ

zara bhi dam tere bimar-e-na-tawan mein nahin

makan mein yun hai ki jaise koi makan mein nahin

wo chheD chheD ke puchhen na dil ke dard ka haal

kaho zaban se ye taqat meri zaban mein nahin

chaman mein kis ke liye bijliyan taDapti hain

gul aashiyan mein nahin shaKH aashiyan mein nahin

tumhaare dar se uThata hai kyon hamein darban

kuchh aise lal lage sang-e-astan mein nahin

main sar-ba-kaf hun wo KHanjar-ba-kaf hain maqtal mein

ajal se kah do ki ab der imtihan mein nahin

karenge wo nigah-e-naz se hadaf dil ko

chaDhi kaman hai nawak magar kaman mein nahin

jigar ne ji jo churaya to dil pukar uThTha

sharik-e-haal mera koi imtihan mein nahin

nazar na ki mere haal-e-tabah par us ne

ye kah diya ki asar kuchh meri fughan mein nahin

masal ye ek zamane mein sunte aae hain

na ho makin to raunaq koi makan mein nahin

jo phul aaj kaf-e-gul-farosh mein dekha

wo baghban ke bhi ab wahm mein guman mein nahin

ye lutf puchhiye kuchh aap marne walon se

janab-e-KHizr maza umr-e-jawedan mein nahin

suna ki qissa-e-'safdar' hai dard se KHali

maze ki chiz yahi thi jo dastan mein nahin