zara bhi dil mein judai ka gham nahin rakhte

zarā bhī dil meñ judā.ī kā ġham nahīñ rakhte

bichhaḌ gayā jo use yaad ham nahīñ rakhte

ḳhabar jo hotī hameñ qāfiloñ ke luTne kī

to aisī raah meñ hargiz qadam nahīñ rakhte

unhīñ ko hukm milā hai fasāna likhne kā

jo apnī jeb meñ koī qalam nahīñ rakhte

dikhā.ī detī nahīñ ab saf-e-azā-dārāñ

yahāñ ke log bhī koī alam nahīñ rakhte

jalā ke raakh kiyā jis ne muft meñ ham ko

ham aise shaḳhs ko ab mohtaram nahīñ rakhte

yahāñ to apnī basīrat pe naaz hai sab ko

yahāñ ke log koī jām-e-jam nahīñ rakhte

zara bhi dil mein judai ka gham nahin rakhte

bichhaD gaya jo use yaad hum nahin rakhte

KHabar jo hoti hamein qafilon ke luTne ki

to aisi rah mein hargiz qadam nahin rakhte

unhin ko hukm mila hai fasana likhne ka

jo apni jeb mein koi qalam nahin rakhte

dikhai deti nahin ab saf-e-aza-daran

yahan ke log bhi koi alam nahin rakhte

jala ke rakh kiya jis ne muft mein hum ko

hum aise shaKHs ko ab mohtaram nahin rakhte

yahan to apni basirat pe naz hai sab ko

yahan ke log koi jam-e-jam nahin rakhte