zara dekhna KHaksari hamari

zarā dekhnā ḳhāksārī hamārī

milī ḳhaak meñ ḳhaak saarī hamārī

use hashr meñ ai ḳhizar dekh leñge

agar zindagī hai tumhārī hamārī

ye kahte haiñ mizhgān-e-tar ko dikhā kar

bujhī zahr meñ hai kaTārī hamārī

vabāl-e-jahāñ haiñ ye aalam ke uupar

mare par bhī hai laash bhārī hamārī

hameñ tum ho rūh-e-ravāñ se ziyāda

tumheñ kuchh nahīñ jaan pyārī hamārī

baham rah sakeñ kis tarah aag paanī

nibhe dostī kyā tumhārī hamārī

mare par bhī ai 'shād' taqdīr bigḌī

kisī ne na uqbā sañvārī hamārī

zara dekhna KHaksari hamari

mili KHak mein KHak sari hamari

use hashr mein ai KHizar dekh lenge

agar zindagi hai tumhaari hamari

ye kahte hain mizhgan-e-tar ko dikha kar

bujhi zahr mein hai kaTari hamari

wabaal-e-jahan hain ye aalam ke upar

mare par bhi hai lash bhaari hamari

hamein tum ho ruh-e-rawan se ziyaada

tumhein kuchh nahin jaan pyari hamari

baham rah saken kis tarah aag pani

nibhe dosti kya tumhaari hamari

mare par bhi ai 'shad' taqdir bigDi

kisi ne na uqba sanwari hamari