zara dekho ki manzar aasman ke par bhi to hai

zarā dekho ki manzar āsmāñ ke paar bhī to hai

safar hai shart thoḌā jism-o-jāñ ke paar bhī to hai

zarūrī to nahīñ har lafz tum par munkashif ho jaa.e

ki ik kirdār tūl-e-dāstāñ ke paar bhī to hai

abhī se mātam-e-fasl-e-bahārāñ hai nahīñ jaa.ez

gul-e-afsurdagī fasl-e-ḳhizāñ ke paar bhī to hai

bahut ro.e ho lekin daftar-e-ġham tah nahīñ karnā

abhī ik bahr-e-ḳhūñ āh-o-fuġhāñ ke paar bhī to hai

nahīñ mahdūd bas is ḳhāk-dāñ tak ishq kī shorish

sadā-e-dard jaarī lā-makāñ ke paar bhī to hai

arūz-o-ma.anī-o-ilm-e-bayāñ uslūb sab barsar

suḳhan pinhāñ koī zor-e-bayāñ ke paar bhī to hai

zara dekho ki manzar aasman ke par bhi to hai

safar hai shart thoDa jism-o-jaan ke par bhi to hai

zaruri to nahin har lafz tum par munkashif ho jae

ki ek kirdar tul-e-dastan ke par bhi to hai

abhi se matam-e-fasl-e-bahaaran hai nahin jaez

gul-e-afsurdagi fasl-e-KHizan ke par bhi to hai

bahut roe ho lekin daftar-e-gham tah nahin karna

abhi ek bahr-e-KHun aah-o-fughan ke par bhi to hai

nahin mahdud bas is KHak-dan tak ishq ki shorish

sada-e-dard jari la-makan ke par bhi to hai

aruz-o-mani-o-ilm-e-bayan uslub sab barsar

suKHan pinhan koi zor-e-bayan ke par bhi to hai