zara mushkil se samjhenge hamare tarjuman hum ko

zarā mushkil se samjheñge hamāre tarjumāñ ham ko

abhī dohrā rahī hai ḳhud hamārī dāstāñ ham ko

kisī ko kyā ḳhabar patthar ke pairoñ par khaḌe haiñ ham

sadāoñ par sadā.eñ de rahe haiñ kārvāñ ham ko

ham aise sūrmā haiñ laḌ ke jab hālāt se palTe

to baḌh ke zindagī ne pesh kiiñ baisākhiyāñ ham ko

sambhālā hosh jab ham ne to kuchh muḳhlis azīzoñ ne

ka.ī chehre diye aur ek patthar kī zabāñ ham ko

uThā hai shor ḳhud apne hī andar se magar aksar

dahal ke band kar lenā paḌī haiñ khiḌkiyāñ ham ko

ham apne jism meñ bikhre hue haiñ ret kī sūrat

sameTeñgī kahāñ tak zindagī kī muTThiyāñ ham ko

bichhaḌ ke bhiiḌ meñ ḳhud se havāsoñ kā vo aalam thā

ki muñh khole hue taktī rahīñ parchhā.iyāñ ham ko

zara mushkil se samjhenge hamare tarjuman hum ko

abhi dohra rahi hai KHud hamari dastan hum ko

kisi ko kya KHabar patthar ke pairon par khaDe hain hum

sadaon par sadaen de rahe hain karwan hum ko

hum aise surma hain laD ke jab haalat se palTe

to baDh ke zindagi ne pesh kin baisakhiyan hum ko

sambhaala hosh jab hum ne to kuchh muKHlis azizon ne

kai chehre diye aur ek patthar ki zaban hum ko

uTha hai shor KHud apne hi andar se magar aksar

dahal ke band kar lena paDi hain khiDkiyan hum ko

hum apne jism mein bikhre hue hain ret ki surat

sameTengi kahan tak zindagi ki muTThiyan hum ko

bichhaD ke bhiD mein KHud se hawason ka wo aalam tha

ki munh khole hue takti rahin parchhaiyan hum ko