zara sa jhank lo in be-qarar aankhon mein

zarā sā jhāñk lo in be-qarār āñkhoñ meñ

dikhā.ī degā tumhārā dayār āñkhoñ meñ

garāñ hue mire dilbar firāq ke lamhe

ubhar ke dil se chalā aayā pyaar āñkhoñ meñ

zahe-nasīb ruḳh-e-nāz gar nazar aa.e

basā ke rakh luuñ maiñ jān-e-bahār āñkhoñ meñ

kahāñ qayām hai jān-e-jigar batā de zarā

yahī savāl uThā baar baar āñkhoñ meñ

tumhārī yaad meñ mashġhūl ho ga.iiñ jab se

ḳhizāñ kī fasl meñ aa.ī bahār āñkhoñ meñ

zamīn-e-ashk pe chhā.ī hai is qadar ḳhushkī

jagah jagah pe paḌī hai darār āñkhoñ meñ

na hoñ vo ḳhīrā tajallī ko dekh kar terī

vo tāb-e-dīd de parvardigār āñkhoñ meñ

rukī rukī sī haiñ nazreñ tumhārī rāhoñ par

thamā thamā sā hai dil kā qarār āñkhoñ meñ

dikhā do chehra ki dam toḌtī haiñ ab sāñseñ

umiid ho na kahīñ taar taar āñkhoñ meñ

tumhāre hijr meñ nargis bhī ḳhuun rotī hai

liye hai ashk musalsal bahār āñkhoñ meñ

jo maut hasrat-e-dīdār meñ mujhe aa.ī

tumhārī yaad kā hogā mazār āñkhoñ meñ

'falak gavāh hai ro ro ke paḌ ga.e halqe

basā huā hai tirā intizār āñkhoñ meñ

zara sa jhank lo in be-qarar aankhon mein

dikhai dega tumhaara dayar aankhon mein

garan hue mere dilbar firaq ke lamhe

ubhar ke dil se chala aaya pyar aankhon mein

zahe-nasib ruKH-e-naz gar nazar aae

basa ke rakh lun main jaan-e-bahaar aankhon mein

kahan qayam hai jaan-e-jigar bata de zara

yahi sawal uTha bar bar aankhon mein

tumhaari yaad mein mashghul ho gain jab se

KHizan ki fasl mein aai bahaar aankhon mein

zamin-e-ashk pe chhai hai is qadar KHushki

jagah jagah pe paDi hai darar aankhon mein

na hon wo KHira tajalli ko dekh kar teri

wo tab-e-did de parwardigar aankhon mein

ruki ruki si hain nazren tumhaari rahon par

thama thama sa hai dil ka qarar aankhon mein

dikha do chehra ki dam toDti hain ab sansen

umid ho na kahin tar tar aankhon mein

tumhaare hijr mein nargis bhi KHun roti hai

liye hai ashk musalsal bahaar aankhon mein

jo maut hasrat-e-didar mein mujhe aai

tumhaari yaad ka hoga mazar aankhon mein

'falak gawah hai ro ro ke paD gae halqe

basa hua hai tera intizar aankhon mein