ذرا سا جھانک لو ان بیقرار آنکھوں میں

ذرا سا جھانک لو ان بیقرار آنکھوں میں

دکھائی دے گا تمہارا دیار آنکھوں میں

گراں ہوئے مرے دلبر فراق کے لمحے

ابھر کے دل سے چلا آیا پیار آنکھوں میں

زہے نصیب رخ ناز گر نظر آئے

بسا کے رکھ لوں میں جان بہار آنکھوں میں

کہاں قیام ہے جان جگر بتا دے ذرا

یہی سوال اٹھا بار بار آنکھوں میں

تمہاری یاد میں مشغول ہو گئیں جب سے

خزاں کی فصل میں آئی بہار آنکھوں میں

زمین اشک پہ چھائی ہے اس قدر خشکی

جگہ جگہ پہ پڑی ہے درار آنکھوں میں

نہ ہوں وہ خیرا تجلی کو دیکھ کر تیری

وہ تاب دید دے پروردگار آنکھوں میں

رکی رکی سی ہیں نظریں تمہاری راہوں پر

تھما تھما سا ہے دل کا قرار آنکھوں میں

دکھا دو چہرہ کہ دم توڑتی ہیں اب سانسیں

امید ہو نہ کہیں تار تار آنکھوں میں

تمہارے ہجر میں نرگس بھی خون روتی ہے

لیے ہے اشک مسلسل بہار آنکھوں میں

جو موت حسرت دیدار میں مجھے آئی

تمہاری یاد کا ہوگا مزار آنکھوں میں

فلکؔ گواہ ہے رو رو کے پڑ گئے حلقے

بسا ہوا ہے ترا انتظار آنکھوں میں