zara se dauraniye ki ulfat ko jawedana bana raha hun

zarā se daurāniye kī ulfat ko jāvedāna banā rahā huuñ

maiñ ek bālisht bhar mohabbat se ik fasāna banā rahā huuñ

mujhe vafāoñ ke qaht kā ek saḳht mausam guzārnā hai

mohabbatoñ ko hanūt kar ke nigār-ḳhāna banā rahā huuñ

jo par kaTe maslahat-pasandī meñ shāḳh-e-dil par ruke hue the

maiñ un parindoñ se sāda-lauhī meñ dostāna banā rahā huuñ

ġhazab kī chingāriyāñ to dildāriyoñ kī shabnam se sard hoñgī

maiñ talḳh lahjoñ ko narm lafzoñ se mushfiqāna banā rahā huuñ

havā tanābeñ ukheḌ Daale ki sā.ebāñ ko udheḌ Daale

maiñ ḳhauf se be-niyāz ho kar ye āshiyāna banā rahā huuñ

jahāñ maiñ ab ḳhema-zan huā thā vahāñ se chashma ubal paḌā hai

so muḳhtasar se paḌāv ko mustaqil Thikāna banā rahā huuñ

zara se dauraniye ki ulfat ko jawedana bana raha hun

main ek baalisht bhar mohabbat se ek fasana bana raha hun

mujhe wafaon ke qaht ka ek saKHt mausam guzarna hai

mohabbaton ko hanut kar ke nigar-KHana bana raha hun

jo par kaTe maslahat-pasandi mein shaKH-e-dil par ruke hue the

main un parindon se sada-lauhi mein dostana bana raha hun

ghazab ki chingariyan to dildariyon ki shabnam se sard hongi

main talKH lahjon ko narm lafzon se mushfiqana bana raha hun

hawa tanaben ukheD Dale ki saeban ko udheD Dale

main KHauf se be-niyaz ho kar ye aashiyana bana raha hun

jahan main ab KHema-zan hua tha wahan se chashma ubal paDa hai

so muKHtasar se paDaw ko mustaqil Thikana bana raha hun