zara si der sahi ruKH badalna chahta hai

zarā sī der sahī ruḳh badalnā chāhtā hai

jise bhī dekhiye ghar se nikalnā chāhtā hai

mirā mizāj samajhne kī bhī kare zahmat

vo ek shaḳhs ki mujh ko badalnā chāhtā hai

laraz rahī hai yahāñ lo charāġh-e-ḳhāna kī

batāo kaun sar-e-rāh jalnā chāhtā hai

ik iztirāb hai dil se darīcha-e-jāñ tak

ye kaun mujh meñ chhupā hai nikalnā chāhtā hai

na.e safar pe kiyā jis ne mujh ko āmāda

vahī to ab mirā rastā badalnā chāhtā hai

balā se taaj meñ chamke ki ḳhaak meñ mil jaa.e

guhar to batn-e-sadaf se nikalnā chāhtā hai

ḳhushī to ye hai ki chalnā sikhā rahā huuñ use

jo shaḳhs mujh se bhī aage nikalnā chāhtā hai

zara si der sahi ruKH badalna chahta hai

jise bhi dekhiye ghar se nikalna chahta hai

mera mizaj samajhne ki bhi kare zahmat

wo ek shaKHs ki mujh ko badalna chahta hai

laraz rahi hai yahan lo charagh-e-KHana ki

batao kaun sar-e-rah jalna chahta hai

ek iztirab hai dil se daricha-e-jaan tak

ye kaun mujh mein chhupa hai nikalna chahta hai

nae safar pe kiya jis ne mujh ko aamada

wahi to ab mera rasta badalna chahta hai

bala se taj mein chamke ki KHak mein mil jae

guhar to batn-e-sadaf se nikalna chahta hai

KHushi to ye hai ki chalna sikha raha hun use

jo shaKHs mujh se bhi aage nikalna chahta hai