zara soz-e-dil bazm ka saz dena

zarā soz-e-dil bazm kā saaz denā

ki ḳhud bolnā hai ḳhud āvāz denā

ajab zauq-e-pinhāñ hai rang-e-tapish meñ

tasallī na ai shoḳh-andāz denā

kabhī DhūñDhnā go shahā-e-haram meñ

kabhī dair meñ jā ke āvāz denā

guloñ ke haiñ āġhosh vā bahr-e-ruḳhsat

zarā baḌh ke bulbul ko āvāz denā

na le merā īmān ai be-niyāzī

ki hai nazr jalva-gah-e-nāz denā

ḳhayābāñ ḳhayābāñ meñ paiham tajassus

bayābāñ bayābāñ meñ āvāz denā

udhar merī tauba kī Dhāras bañdhānā

idhar mujh ko sāġhar ba-sad-nāz denā

hai gum-karda rāh-e-mohabbat meñ 'sāqib'

zarā muḌ ke phir us ko āvāz denā

zara soz-e-dil bazm ka saz dena

ki KHud bolna hai KHud aawaz dena

ajab zauq-e-pinhan hai rang-e-tapish mein

tasalli na ai shoKH-andaz dena

kabhi DhunDhna go shaha-e-haram mein

kabhi dair mein ja ke aawaz dena

gulon ke hain aaghosh wa bahr-e-ruKHsat

zara baDh ke bulbul ko aawaz dena

na le mera iman ai be-niyazi

ki hai nazr jalwa-gah-e-naz dena

KHayaban KHayaban mein paiham tajassus

bayaban bayaban mein aawaz dena

udhar meri tauba ki Dhaaras bandhana

idhar mujh ko saghar ba-sad-naz dena

hai gum-karda rah-e-mohabbat mein 'saqib'

zara muD ke phir us ko aawaz dena