zara zara si aan mein wo jaan-e-jaan badal gaya

zarā zarā sī aan meñ vo jān-e-jāñ badal gayā

kabhī to baat kaaT dī kabhī zabāñ badal gayā

hameñ to ye gila nahīñ ki jān-e-jāñ badal gayā

gila ye hai ki vo ba-haqq-e-dīgarāñ badal gayā

bahār to bahār thī ḳhizāñ bhī ab bahār hai

nizām-e-gulsitāñ mizāj-e-bāġhbāñ badal gayā

bajā ki hai taġhayyur-e-chaman se zīnat-e-chaman

magar ye kyā ki gulsitāñ kā gulsitāñ badal gayā

fuġhān-o-zabt-e-āh meñ yahī hai farq aur kyā

ki aag to lagī rahī magar dhuāñ badal gayā

rah-e-hayāt se hazāroñ rāste nikal ga.e

kise ye ab ḳhayāl hai ki koī kahāñ badal gayā

tirī nigāh thī to ik jahān sāzgār thā

tirī nigāh phir ga.ī to ik jahāñ badal gayā

vahī fareb-e-dushmanāñ hai is kā ġham nahīñ hameñ

hameñ to ġham ye hai ḳhulūs-e-dostāñ badal gayā

junūñ ne sauñp dī ḳhirad ke haath rasm-e-rahbarī

lo ahl-e-kārvāñ amīr-e-kārvāñ badal gayā

vajūd se adam ko yuuñ chalā gayā hai ik ġharīb

kirā.e-dār jis tarah koī makāñ badal gayā

haram se jo ḳhulūs thā hai der se vahī ḳhulūs

jabīñ vahī hai kyā huā jo āstāñ badal gayā

zara zara si aan mein wo jaan-e-jaan badal gaya

kabhi to baat kaT di kabhi zaban badal gaya

hamein to ye gila nahin ki jaan-e-jaan badal gaya

gila ye hai ki wo ba-haqq-e-digaran badal gaya

bahaar to bahaar thi KHizan bhi ab bahaar hai

nizam-e-gulsitan mizaj-e-baghban badal gaya

baja ki hai taghayyur-e-chaman se zinat-e-chaman

magar ye kya ki gulsitan ka gulsitan badal gaya

fughan-o-zabt-e-ah mein yahi hai farq aur kya

ki aag to lagi rahi magar dhuan badal gaya

rah-e-hayat se hazaron raste nikal gae

kise ye ab KHayal hai ki koi kahan badal gaya

teri nigah thi to ek jahan sazgar tha

teri nigah phir gai to ek jahan badal gaya

wahi fareb-e-dushmanan hai is ka gham nahin hamein

hamein to gham ye hai KHulus-e-dostan badal gaya

junun ne saunp di KHirad ke hath rasm-e-rahbari

lo ahl-e-karwan amir-e-karwan badal gaya

wajud se adam ko yun chala gaya hai ek gharib

kirae-dar jis tarah koi makan badal gaya

haram se jo KHulus tha hai der se wahi KHulus

jabin wahi hai kya hua jo aastan badal gaya