zarb-e-taza-kari hai hadisa purana hai

zarb-e-tāza-kārī hai hādisa purānā hai

sang-e-nau ke narġhe meñ phir vahī divāna hai

jab se ye ghaTā us ke gesūoñ kī chhā.ī hai

bijliyoñ kī yūrish meñ tab se āshiyāna hai

zindagī kī āzādī intishār-e-qālib hai

ruuh ke parindoñ kā jism qaid-ḳhāna hai

khel hai guzar jaanā darmiyān-e-hastī se

ik taraf mohabbat hai ik taraf zamāna hai

nafs ke darīche se dil kī dhaḌkaneñ guzrīñ

aatī jaatī sāñsoñ kā raqs tāziyāna hai

dil kī be-qarārī kā iztirāb kyā likhkhūñ

kārsāz-e-ulfat kā shauq tājirāna hai

aadmī ke rishte bhī kitne TuuTe phūTe haiñ

zindagī kī qadroñ kā ruup hī yagāna hai

kyā 'sahar' zamāne kā inhitāt-e-tahzībī

irtiqā-e-hastī kā qīmtī ḳhazāna hai

zarb-e-taza-kari hai hadisa purana hai

sang-e-nau ke narghe mein phir wahi diwana hai

jab se ye ghaTa us ke gesuon ki chhai hai

bijliyon ki yurish mein tab se aashiyana hai

zindagi ki aazadi intishaar-e-qalib hai

ruh ke parindon ka jism qaid-KHana hai

khel hai guzar jaana darmiyan-e-hasti se

ek taraf mohabbat hai ek taraf zamana hai

nafs ke dariche se dil ki dhaDkanen guzrin

aati jati sanson ka raqs taziyana hai

dil ki be-qarari ka iztirab kya likhkhun

karsaz-e-ulfat ka shauq tajirana hai

aadmi ke rishte bhi kitne TuTe phuTe hain

zindagi ki qadron ka rup hi yagana hai

kya 'sahar' zamane ka inhitat-e-tahzibi

irtiqa-e-hasti ka qimti KHazana hai