zard chehron se nikalti raushni achchhi nahin

zard chehroñ se nikaltī raushnī achchhī nahīñ

shahr kī galiyoñ meñ ab āvārgī achchhī nahīñ

zinda rahnā hai to har bahrūpiye ke saath chal

makr kī tīra-fazā meñ sādgī achchhī nahīñ

kis ne izn-e-qatl de kar sādgī se kah diyā

aadmī kī aadmī se dushmanī achchhī nahīñ

jab mire bachche mire vāris haiñ un ke jism meñ

sochtā huuñ hiddat-e-ḳhūñ kī kamī achchhī nahīñ

gosh-bar-āvāz haiñ kamre kī dīvāreñ 'sabā'

taḳhliye meñ ḳhud se achchhī baat bhī achchhī nahīñ

zard chehron se nikalti raushni achchhi nahin

shahr ki galiyon mein ab aawargi achchhi nahin

zinda rahna hai to har bahrupiye ke sath chal

makr ki tira-faza mein sadgi achchhi nahin

kis ne izn-e-qatl de kar sadgi se kah diya

aadmi ki aadmi se dushmani achchhi nahin

jab mere bachche mere waris hain un ke jism mein

sochta hun hiddat-e-KHun ki kami achchhi nahin

gosh-bar-awaz hain kamre ki diwaren 'saba'

taKHliye mein KHud se achchhi baat bhi achchhi nahin