zard peDon pe naya rang zara aane de

zard peḌoñ pe nayā rañg zarā aane de

is taraf bhī na.e mausam kī havā aane de

jumbish-e-chashm se garmā de mirā sard lahū

sust dariyā ko samundar kī sadā aane de

shāḳh-e-hālāt se ab jhaaḌ bhī de tursh samar

talḳh hoñToñ pe koī taaza mazā aane de

yuuñ to khā jā.egī zulmāt-e-dil-o-jāñ sab ko

band kamroñ meñ kahīñ se to ziyā aane de

garm rātoñ meñ ḳhunuk zau kī paḌe dil pe phuvār

surḳh hāthoñ kī koī sham-e-hinā aane de

jam.a hai zehn meñ kitnā ḳhas-o-ḳhāshāk-e-ḳhayāl

is khaḌe paanī meñ bhī mauj-e-balā aane de

ḳhushk pattoñ se bharī shāḳheñ huiiñ bār-e-nazar

baaġh kā sab se baḌā peḌ hilā aane de

ḳhvāhish-e-sāya mujhe chalne na degī 'shāhīñ'

raah kī pahlī ye dīvār girā aane de

zard peDon pe naya rang zara aane de

is taraf bhi nae mausam ki hawa aane de

jumbish-e-chashm se garma de mera sard lahu

sust dariya ko samundar ki sada aane de

shaKH-e-haalat se ab jhaD bhi de tursh samar

talKH honTon pe koi taza maza aane de

yun to kha jaegi zulmat-e-dil-o-jaan sab ko

band kamron mein kahin se to ziya aane de

garm raaton mein KHunuk zau ki paDe dil pe phuwar

surKH hathon ki koi sham-e-hina aane de

jama hai zehn mein kitna KHas-o-KHashak-e-KHayal

is khaDe pani mein bhi mauj-e-bala aane de

KHushk patton se bhari shaKHen huin bar-e-nazar

bagh ka sab se baDa peD hila aane de

KHwahish-e-saya mujhe chalne na degi 'shahin'

rah ki pahli ye diwar gira aane de