زرد پنجر ہنہنائے سامنے کھائی نہ تھی

زرد پنجر ہنہنائے سامنے کھائی نہ تھی

جس کا خدشہ ہم کو بھی تھا وہ گھڑی آئی نہ تھی

پارہ پارہ جسم و جاں لا منظری گم گشتگی

تھی قبا آراستہ شمشیر لہرائی نہ تھی

کاٹ کر دست دعا جیبوں میں رکھ کر چل دئے

دھوپ سنولائی تھی بنجر پر گھٹا چھائی نہ تھی

رات بھر معبد میں رقص آتشیں ہوتا رہا

برف پلکوں سے ہٹانے کی توانائی نہ تھی

راہ وار ابر پر آئے تھے جانے کیا ہوئے

ہم بھی چل کے آئے تھے پانی میں گہرائی نہ تھی

ساحلوں پر سب امڈ آئے گھروں کو چھوڑ کر

ہم سمجھتے تھے کسی سے بھی شناسائی نہ تھی