zarf hai kis mein ki wo sara jahan le kar chale

zarf hai kis meñ ki vo saarā jahāñ le kar chale

ham to duniyā se faqat ik dard-e-jāñ le kar chale

aadmī ko chāhiye taufīq chalne kī faqat

kuchh nahīñ to guzre vaqtoñ kā dhuāñ le kar chale

jab bahāreñ bevafā nikleñ to kis ummīd par

intizār-e-gul kī hasrat bāġhbāñ le kar chale

kab muqaddar kā kahāñ kaisā koī manzar bane

ham hathelī par lakīroñ ke makāñ le kar chale

rahbarī kā kuchh salīqa hai na manzil kī ḳhabar

kaun sī jānib ye mīr-e-kārvāñ le kar chale

dekhte haiñ zindagī ko apne hī andāz se

ham jidhar ko chal paḌe ik dāstāñ le kar chale

zulmateñ tārīk shab kī duur karne ke liye

bādaloñ se ham ai 'āzim' bijliyāñ le kar chale

zarf hai kis mein ki wo sara jahan le kar chale

hum to duniya se faqat ek dard-e-jaan le kar chale

aadmi ko chahiye taufiq chalne ki faqat

kuchh nahin to guzre waqton ka dhuan le kar chale

jab bahaaren bewafa niklen to kis ummid par

intizar-e-gul ki hasrat baghban le kar chale

kab muqaddar ka kahan kaisa koi manzar bane

hum hatheli par lakiron ke makan le kar chale

rahbari ka kuchh saliqa hai na manzil ki KHabar

kaun si jaanib ye mir-e-karwan le kar chale

dekhte hain zindagi ko apne hi andaz se

hum jidhar ko chal paDe ek dastan le kar chale

zulmaten tarik shab ki dur karne ke liye

baadalon se hum ai 'azim' bijliyan le kar chale