zarra-e-na-tapida ki KHwahish-e-aftab kya

zarra-e-nā-tapīda kī ḳhvāhish-e-āftāb kyā

naġhma-e-nā-shunīda kā hausla-e-rabāb kyā

umr kā dil hai muzmahil ziist hai dard-e-mustaqil

aise nizām-e-dahr meñ vasvasa-e-azāb kyā

naġhma ba-lab haiñ kiyāriyāñ raqs meñ zarra-e-tapāñ

sun liyā kisht-e-ḳhushk ne zamzama-e-sahāb kyā

chehra-e-shab damak uThā surḳh shafaq jhalak uThī

vaqt-e-tulū kah gayā jaane āftāb kyā

rindoñ se bāz-purs kī pīr-e-muġhāñ se dil-lagī

aaj ye mohtasib ne bhī pī hai kahīñ sharāb kyā

sham.a thī laakh adh-jalī bazm meñ raushnī to thī

varna ġham-e-nashāt meñ raushni-e-gulāb kyā

ġhair kī rah-guzar hai ye dost kī rah-guzar nahīñ

kaun uThā.egā tujhe dekh rahā hai ḳhvāb kyā

muddatoñ se ḳhalish jo thī jaise vo kam sī ho chalī

aaj mire savāl kā mil hī gayā javāb kyā

haañ tirī manzil-e-murād duur bahut hī duur hai

phir bhī har ek moḌ par dil meñ ye iztirāb kyā

zarra-e-na-tapida ki KHwahish-e-aftab kya

naghma-e-na-shunida ka hausla-e-rabab kya

umr ka dil hai muzmahil zist hai dard-e-mustaqil

aise nizam-e-dahr mein waswasa-e-azab kya

naghma ba-lab hain kiyariyan raqs mein zarra-e-tapan

sun liya kisht-e-KHushk ne zamzama-e-sahab kya

chehra-e-shab damak uTha surKH shafaq jhalak uThi

waqt-e-tulu kah gaya jaane aaftab kya

rindon se baz-purs ki pir-e-mughan se dil-lagi

aaj ye mohtasib ne bhi pi hai kahin sharab kya

shama thi lakh adh-jali bazm mein raushni to thi

warna gham-e-nashat mein raushni-e-gulab kya

ghair ki rah-guzar hai ye dost ki rah-guzar nahin

kaun uThaega tujhe dekh raha hai KHwab kya

muddaton se KHalish jo thi jaise wo kam si ho chali

aaj mere sawal ka mil hi gaya jawab kya

han teri manzil-e-murad dur bahut hi dur hai

phir bhi har ek moD par dil mein ye iztirab kya