zarraat ke jauhar mein ehsan-e-KHuda tum ho

zarrāt ke jauhar meñ ehsān-e-ḳhudā tum ho

ye merī anā kyā hai irfān-e-ḳhudā tum ho

har qatra-e-shabnam meñ har rang-e-gul-e-tar meñ

yā jān-e-ḳhudā tum ho yā shān-e-ḳhudā tum ho

zāhir meñ mazāhib haiñ bātin meñ tumhī tum ho

injīl ho giitā ho qur.ān-e-ḳhudā tum ho

tā-hadd-e-ufuq har-sū jalve hī tumhāre haiñ

vus.at meñ ḳhalāoñ kī elān-e-ḳhudā tum ho

duniyā meñ ye jo kuchh hai sab kis kā karishma hai

tum raunaq-e-ālam ho faizān-e-ḳhudā tum ho

tāroñ ke ujāloñ meñ duniyā ke nazāroñ meñ

taḳhlīq kā maqsad ho armān-e-ḳhudā tum ho

tum sham-e-hidāyat ho tum nuur kā haala ho

sar-tā-pā haqīqat ho īmān-e-ḳhudā tum ho

zarraat ke jauhar mein ehsan-e-KHuda tum ho

ye meri ana kya hai irfan-e-KHuda tum ho

har qatra-e-shabnam mein har rang-e-gul-e-tar mein

ya jaan-e-KHuda tum ho ya shan-e-KHuda tum ho

zahir mein mazahib hain baatin mein tumhi tum ho

injil ho gita ho quran-e-KHuda tum ho

ta-hadd-e-ufuq har-su jalwe hi tumhaare hain

wusat mein KHalaon ki elan-e-KHuda tum ho

duniya mein ye jo kuchh hai sab kis ka karishma hai

tum raunaq-e-alam ho faizan-e-KHuda tum ho

taron ke ujalon mein duniya ke nazaron mein

taKHliq ka maqsad ho arman-e-KHuda tum ho

tum sham-e-hidayat ho tum nur ka haala ho

sar-ta-pa haqiqat ho iman-e-KHuda tum ho