zarre zarre mein nihan ek nagin tha pahle

zarre zarre meñ nihāñ ek nagīñ thā pahle

lekin is dasht meñ dil aur kahīñ thā pahle

āsmāñ mujh ko kahāñ sarf kiye jaatā hai

mujh ko is baat kā ehsās nahīñ thā pahle

vaqt ḳhud us ko faqīrī kī taraf le aayā

jo faqīroñ pe bahut chīñ-ba-jabīñ thā pahle

kūcha-e-josh-o-junūñ dekh ke dil Duub gayā

in makānoñ meñ bahut shor-e-makīñ thā pahle

aap zahmat-kash-e-ummīd kahāñ hote the

varna har baat kā imkān yahīñ thā pahle

aisā mā.ūf kiyā TuuTe irādoñ ne mujhe

jo gumāñ aaj guzartā hai yaqīñ thā pahle

har gul-e-nau kī adā yaad dilā jaatī hai

hū-ba-hū maiñ bhī kabhī naaz ba-īñ thā pahle

tasht-az-bām kiye kār-e-suḳhan-dānī ne

varna dil kitne hī rāzoñ kā amiiñ thā pahle

gunjlak nuqta-e-sāda ko banāyā 'tāsif'

aisā mushkil bhī kahāñ dīn-e-mubīñ thā pahle

zarre zarre mein nihan ek nagin tha pahle

lekin is dasht mein dil aur kahin tha pahle

aasman mujh ko kahan sarf kiye jata hai

mujh ko is baat ka ehsas nahin tha pahle

waqt KHud us ko faqiri ki taraf le aaya

jo faqiron pe bahut chin-ba-jabin tha pahle

kucha-e-josh-o-junun dekh ke dil Dub gaya

in makanon mein bahut shor-e-makin tha pahle

aap zahmat-kash-e-ummid kahan hote the

warna har baat ka imkan yahin tha pahle

aisa mauf kiya TuTe iradon ne mujhe

jo guman aaj guzarta hai yaqin tha pahle

har gul-e-nau ki ada yaad dila jati hai

hu-ba-hu main bhi kabhi naz ba-in tha pahle

tasht-az-baam kiye kar-e-suKHan-dani ne

warna dil kitne hi raazon ka amin tha pahle

gunjlak nuqta-e-sada ko banaya 'tasif'

aisa mushkil bhi kahan din-e-mubin tha pahle