ذروں کو حریف مہ و خورشید بنا دو

ذروں کو حریف مہ و خورشید بنا دو

انسان کی راہوں میں ستاروں کو بچھا دو

وہ زلف سیہ پوش کہ ہے جس سے اندھیرا

خورشید جہاں تاب کے چہرے سے ہٹا دو

طوفان و حوادث کی شکایات کہاں تک

طوفان و حوادث سے سفینوں کو لڑا دو

جو اپنی نظر تشنہ لبوں پر نہیں رکھتا

اس ساقیٔ کم ظرف کو محفل سے اٹھا دو

پرویزیٔ پرویز ہے کچھ روز کی مہماں

دارایٔ دارا کے غلاموں کو بتا دو

گلشن سے محبت ہے تو اے اہل گلستاں

تفریق گل و لالہ گلستاں سے مٹا دو

دنیا کو دکھا دو کہ ہو تم صبر کے خوگر

آداب وفا جبر کے خوگر کو سکھا دو

فاروقؔ فقط مقصد تخلیق یہی ہے

انسان کو انساں کا پرستار بنا دو