zarurat ke mutabiq to sahaare lazmi honge

zarūrat ke mutābiq to sahāre lāzmī hoñge

agar dariyā banānā ho kināre lāzmī hoñge

ye kārobār-e-ulfat hai yahāñ dil ko baḌā rakhnā

mohabbat kī tijārat meñ ḳhasāre lāzmī hoñge

ye maanā hai ki ik duniyā tumhāre saath chaltī hai

magar kuchh log duniyā meñ hamāre lāzmī hoñge

agar tum raushnī chāho chalo phir saath chalte haiñ

falak par chāñd ho na ho sitāre lāzmī hoñge

vo jis takiye ke nīche se mirī tasvīr miltī thī

kisī ne ḳhvāb us takiye pe vaare lāzmī hoñge

jahāñ ham roz milte the vahāñ kuchh pal farāġhat ke

akele baiTh kar us ne guzāre lāzmī hoñge

ye tai tum ne hī karnā hai ki tum kis samt jāoge

safar meñ har jagah 'sā.im' ishāre lāzmī hoñge

zarurat ke mutabiq to sahaare lazmi honge

agar dariya banana ho kinare lazmi honge

ye karobar-e-ulfat hai yahan dil ko baDa rakhna

mohabbat ki tijarat mein KHasare lazmi honge

ye mana hai ki ek duniya tumhaare sath chalti hai

magar kuchh log duniya mein hamare lazmi honge

agar tum raushni chaho chalo phir sath chalte hain

falak par chand ho na ho sitare lazmi honge

wo jis takiye ke niche se meri taswir milti thi

kisi ne KHwab us takiye pe ware lazmi honge

jahan hum roz milte the wahan kuchh pal faraghat ke

akele baiTh kar us ne guzare lazmi honge

ye tai tum ne hi karna hai ki tum kis samt jaoge

safar mein har jagah 'saim' ishaare lazmi honge