ضروری شے تھی مگر ہاتھ ہی نہیں آئی

ضروری شے تھی مگر ہاتھ ہی نہیں آئی

ہماری سمت کبھی زندگی نہیں آئی

ستم نہیں کہ ہمیں خواب نے رکھا محروم

ستم تو یہ کہ ہمیں نیند بھی نہیں آئی

پرانا دوست ملا پر ملا غرور کے ساتھ

کہ چاند آیا مگر چاندنی نہیں آئی

ہم اپنے کرب تو لفظوں میں باندھ سکتے ہیں

مگر وہ لوگ جنہیں شاعری نہیں آئی

وہ ایک بات جسے بولنے کو مرتے تھے

وہ ایک بات ہمیں بولنی نہیں آئی

غموں کا شکر کہ یہ ساتھ تو رہیں تا عمر

خوشی کا کیا کبھی آئی کبھی نہیں آئی

کسی نے چھپ کے کہیں تو بہائے ہیں آنسو

شدید دھوپ میں یوں ہی نمی نہیں آئی