zauq-e-didar-e-tamasha-bar ruswai hua

zauq-e-dīdār-e-tamāshā-bār rusvā.ī huā

ḳhud tamāshā ban gayā jo bhī tamāshā.ī huā

qarya qarya DhūñDhtī hai rūh-e-lailā qais ko

najd ke sahrā meñ phir aisā na saudā.ī huā

jis lahū se dil meñ raushan dard kī mash.al rahī

vo lahū ik bevafā ke ruḳh kī zebā.ī huā

jaan kar ham kyā kareñge chhoḌ is qisse ko ab

kaun sachchā ishq meñ thā kaun harjā.ī huā

ḳhud-sarī meñ apne saa.e se jo lipTe rah ga.e

un ġhazāloñ kā muqaddar dasht-e-tanhā.ī huā

raushnī kī ik kiran bhī ab to qismat meñ nahīñ

chhin ga.iiñ āñkheñ to phir ehsās-e-bīnā.ī huā

jo zabāñ par lā na sakte the ayaañ sab par huā

fan hamārā bā.is-e-tazhīk-o-rusvā.ī huā

hai junūñ ke faiz se ye jumbish-e-pā varna kab

ḳhār-zāroñ se ilāj-e-ābla-pā.ī huā

kyā tavaqqo.a ab rakheñ 'iqbāl' is duniyā se ham

har qadam par bhaa.ī kā dushman jahāñ bhaa.ī huā

zauq-e-didar-e-tamasha-bar ruswai hua

KHud tamasha ban gaya jo bhi tamashai hua

qarya qarya DhunDhti hai ruh-e-laila qais ko

najd ke sahra mein phir aisa na saudai hua

jis lahu se dil mein raushan dard ki mashal rahi

wo lahu ek bewafa ke ruKH ki zebai hua

jaan kar hum kya karenge chhoD is qisse ko ab

kaun sachcha ishq mein tha kaun harjai hua

KHud-sari mein apne sae se jo lipTe rah gae

un ghazalon ka muqaddar dasht-e-tanhai hua

raushni ki ek kiran bhi ab to qismat mein nahin

chhin gain aankhen to phir ehsas-e-binai hua

jo zaban par la na sakte the ayan sab par hua

fan hamara bais-e-tazhik-o-ruswai hua

hai junun ke faiz se ye jumbish-e-pa warna kab

KHar-zaron se ilaj-e-abla-pai hua

kya tawaqqoa ab rakhen 'iqbaal' is duniya se hum

har qadam par bhai ka dushman jahan bhai hua