zauq-e-nazar baDhaiye gulzar dekh kar

zauq-e-nazar baḌhā.iye gulzār dekh kar

ulfat kā saudā kījiye bāzār dekh kar

maiñ ne junūn-e-ishq se dāman bachā liyā

har bul-havas ko terā parastār dekh kar

mere hī dar pe thā koī saa.il ke ruup meñ

hairat-zada rahā mujhe nādār dekh kar

naġhma-sarā na ho sakā gulshan meñ andalīb

tūfān-o-barq-o-bād ke āsār dekh kar

betāb dil ko aur tarastī nigāh ko

bahlā sakā na maiñ gul-o-gulzār dekh kar

dil guftugū kī samt jhukā sher ban ga.e

iz.hār-e-ġham ko ruuh kā ġham-ḳhvār dekh kar

hosh-o-havas kī jang meñ hairat-zada rahā

jazboñ kā shor aql ke afkār dekh kar

āñkhoñ se kā.enāt ke aañsū Tapak paḌe

shāfī ko is jahān meñ bīmār dekh kar

yaad aa ga.iiñ ḳhirad ko vo jannat kī laġhzisheñ

dil kā junūn-o-shauq sharar-bār dekh kar

hāthoñ meñ dil ke parcham-e-afkār de diyā

insāniyat ko barsar-e-paikār dekh kar

zauq-e-nazar baDhaiye gulzar dekh kar

ulfat ka sauda kijiye bazar dekh kar

main ne junun-e-ishq se daman bacha liya

har bul-hawas ko tera parastar dekh kar

mere hi dar pe tha koi sail ke rup mein

hairat-zada raha mujhe nadar dekh kar

naghma-sara na ho saka gulshan mein andalib

tufan-o-barq-o-baad ke aasar dekh kar

betab dil ko aur tarasti nigah ko

bahla saka na main gul-o-gulzar dekh kar

dil guftugu ki samt jhuka sher ban gae

izhaar-e-gham ko ruh ka gham-KHwar dekh kar

hosh-o-hawas ki jang mein hairat-zada raha

jazbon ka shor aql ke afkar dekh kar

aankhon se kaenat ke aansu Tapak paDe

shafi ko is jahan mein bimar dekh kar

yaad aa gain KHirad ko wo jannat ki laghzishen

dil ka junun-o-shauq sharar-bar dekh kar

hathon mein dil ke parcham-e-afkar de diya

insaniyat ko barsar-e-paikar dekh kar